ឃាត់ខ្លួនជនសង្ស័យចំនួន ៥នាក់ ពាក់ព័ន្ធករណីហិង្សាដោយចេតនា និងប្រើប្រាស់អាវុធដោយគ្មានការអនុញ្ញាត នៅបរិវេណអគាររតនៈសម្បត្តិ ខណ្ឌពោធិ៍សែនជ័យ

(ភ្នំពេញ) ៖ ដោយអនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងការិយាល័យនគរបាលព្រហ្មទណ្ឌកម្រិតស្រាល និងកម្លាំងអធិការដ្ឋាននគរបាលខណ្ឌពោធិ៍សែនជ័យ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងស្នងការដ្ឋាននគរបាលខេត្តបន្ទាយមានជ័យ កម្លាំងស្នងការដ្ឋាននគរបាលខេត្តបាត់ដំបង និងកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានធ្វើស្រាវជ្រាវឃាត់ខ្លួនជនសង្ស័យចំនួន ៥នាក់ ពាក់ព័ន្ធករណីហិង្សាដោយចេតនា និងប្រើប្រាស់អាវុធដោយគ្មានការអនុញ្ញាត ប្រព្រឹត្តនៅចំណុចបរិវេណអគាររតនៈសម្បត្តិ ផ្លូវសហព័ន្ធរុស្សី ភូមិតាងួន២ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី១៤ ខែកុម្ភៈ ឆ្នាំ២០២៥ ។

ជនសង្ស័យដែលឃាត់ខ្លួនចំនួន ៥នាក់ រួមមាន៖

១-ឈ្មោះ HAN CHONG (ហាន ចុង) ភេទប្រុស ជនជាតិចិន (ជនដៃដល់កាន់អាវុធ AK 47 បាញ់ ១គ្រាប់) ។

២-ឈ្មោះ LIU YONGJIE (លូ យ៉ុងជៀ) ភេទប្រុស ជនជាតិចិន (ជនដៃដល់កាន់អាវុធ AK 47) ។

៣-ឈ្មោះ ZHU DACHUN (ស៊ូ ដាឈុន) ភេទប្រុស ជនជាតិចិន (ជនដៃដល់កាន់អាវុធខ្លីក្លែងក្លាយ) ។

៤-ឈ្មោះ DENG TIAN MING (តេង ទៀន ម៉េង) ហៅ អឺម៉ ភេទប្រុស ជនជាតិចិន (ជនដៃដល់យកកាំបិតចាក់លើឈ្មោះ HAN CHONG ) (ហាន ចុង) ។

៥-ឈ្មោះ LI ZIYUAN (លី ហ្សីយាន) ភេទប្រុស ជនជាតិចិន ។

វត្ថុតាងចាប់យក៖ គ្រាប់កាំភ្លើងប្រភេទ AK មិនទាន់ផ្ទុះ ចំនួន ១គ្រាប់, ការ៉ុង ពណ៌ស ចំនួន ១, អាវុធខ្លីគ្មានម៉ាក (ក្លែងក្លាយ) ពណ៌ខ្មៅ ចំនួន ១ដើម និងគ្រាប់ចំនួន ៣គ្រាប់ (ជ័រ), អាវុធវែង ម៉ាក AK 47 ចំនួន ២ដើម, គ្រាប់អាវុធវែង និងខ្លី សរុបចំនួន ៥៩គ្រាប់, ខោជើងខ្លី ចំនួន ១, រថយន្តម៉ាក FAW BESTUNE ពណ៌ប្រផេះ ពាក់ផ្លាកលេខ ភ្នំពេញ 2AC-7210, រថយន្តម៉ាក TOYOTA LEXUS RX330 ពណ៌ ទឹកមាស ពាក់ផ្លាកលេខ ភ្នំពេញ 2AH-2304 ចំនួន ១គ្រឿង ។

បច្ចុប្បន្ន ជនសង្ស័យ និងវត្ថុតាងខាងលើ កម្លាំងជំនាញ កំពុងកសាងសំណុំរឿងចាត់ការតាមនីតិវិធី ៕